بسم الله الرحمن الرحيم
كل واحد فينا بيحلم بانه يغير من نفسه وبيحاول بس بيقول دايما مش قادر او مش عارف او .....
وكلها أسباب غير مقنعه عشان يغير من نفسه , فهو لم يأخذ بالأسباب ولم يبذل أى مجهود لذلك .
ودا مثال بسيط يفتح لنا الموضوع ... تخيل أنك قاعد قدام التلفزيون وبتسمع قناة معينة والريموت بعيد عنك شوية وعاوز تغير القناة ..!! ... هتعمل ايه !!!
الاجابة البديهية هقوم اجيب الريموت واغير القناة يعنى بذلت مجهود عشان تعمل تغيير .... - طب خليك معايا بس -
يعنى مش هتقعد مكانك وتقول للتلفزيون غير يجى مغير نفسه ...
هو دا حالنا بقى ...ان حياتنا كلها عبارة عن قناة واحده وانت عاوز تغيرها وانت قاعد مكانك ... مجربتش تبذل مجهود ولو بسيط عشان تتغير .
كتير من الناس فاقده الامل فى ربنا - نسأل الله لنا ولهم الهدايه - زى ما بيقولوا رمى طوبته خلاص ...
يعنى ناس تيجى تكلمها انت مبتصليش ليه يقولك يا عم انا مش بصلى من زمان وذنوبى كتيرة خلاص انا منفعش ويصاب بحاله من البأس شديده جدا .
بس هو ميعرفش ان ربنا مديله كنز بمعنى الكلمة لما يقرأ اواخر سورة الفرقان :
بسم الله الرحمن الرحيم
" الا من تاب وامن وعمل عملا صالحا فأولئك يبدل الله سيئاتهم حسنات ....."
يعنى لو واحد بقاله 5 سنين مثلا مش بيصلى ونوى انه يتوب بجد ربنا هيكتبله ال5 سنين دول كأنه صلاهم .
وهى دى أول مرحلة فى التغيير وهى التوبة واللى من خلالها المفروض الندم والاقلاع عن الذنب ......
فالتغيير يعنى اكتساب صفات جديده وحلوة تؤثر فى القلب وتسكنه بس بشرط هنعرفه من المثال دا ...
لو معاك كوباية مليانة ماء عن اخرها .... وانت عاوز تصب مية ساقعة جديدة وطعمها حلو ... تخيل المنظر وانت بتصب كدا .!!!
أكيد كل الماء اللى هتصبه هيقع بره ....هو دا حال قلوبنا مليانه بحاجات واحنا عاوزين نتغير ومتمسكين بعاداتنا القديمة السيئة ...
وهو دا الشرط اللازم اننا نتخلص من عيوبنا والقديم ونفضى مكان للجديد ..
كدا انت وضعت الاساس الاول للتغيير ومن اسسه ايضا المهمة انك تكون واثق فعلا انك هتتغير مش مجرد محاولة .
أيضا لازم تكون متفائل وطموح ومثقف بتقرأ كتير ومتابع مجريات الاحداث فى كل المجالات وتتعرف على ناس جديدة تجذبك للخير وتكسبك خبرات .
وان شاء الله للموضوع بقية
والسلام عليكم ورحمة الله وبركاته
هل تريد التعليق على التدوينة ؟